無論你咩膚質，幼滑無瑕肌都不是夢！
如果你屬於定裝噴霧派或者水潤粉底狂熱愛好者，定妝粉/蜜粉對你黎講可能有啲多餘。其實正常嘅，蜜粉一向都被認為只適合油性肌使用，又或者只適合打造霧面妝容。但係......少年你太年輕喇！作為美妝界老臣子，蜜粉又點會得你想像中咁少作用呢？蜜粉最厲害之處係佢持妝力驚人，而且無論咩膚質都適用。使用蜜粉關鍵係上妝技巧，只要針對皮膚需要靈活上妝，就算乾性肌都可以用蜜粉！
今日就等小編介紹下我地嘅獨家武器 — 竹子絲滑蜜粉，教你點樣打造幼滑無瑕肌！
甚麼是定妝粉 / 蜜粉 / 碎粉？
定妝粉 / 蜜粉 / 碎粉 （以下簡稱「蜜粉」）， 係一款令粉底維持全天不掉落嘅產品。除此之外，佢仲百足咁多爪，既可以控油、撫平毛孔及細紋，仲可以令妝感更柔和。配方上而言佢有粉餅（壓實嘅粉）及碎粉（散收收一罐嘅粉）兩種，部分產品含色素、其他則普遍透明無色。粉餅顧名思義就好似一塊餅咁扁扁的，而碎粉就通常有個小圓盒裝住，中間有層細濾網，好似麵粉過篩咁篩啲碎粉出黎上妝。
有色嘅蜜粉會配合返你嘅膚色，而無色蜜粉就適合不同膚色人士。有色蜜粉遮瑕度稍微高少少，可幫助校對膚色、提亮及減低紅症。無色蜜粉就唔會提升遮瑕度，主要作用係令妝感更霧面、更柔和。
無論有色定無色蜜粉，都有粉餅及碎粉兩種配方。
美妝誤區：蜜粉同粉狀粉底係兩個概念黎架！因為蜜粉唔會好似粉狀粉底提供高遮瑕度。以下係使用蜜粉嘅幾個大方向：
- 係粉底及高光上使用，以作定妝
- 柔化 / 霧化出油區域 （素顏都用得！）
- 係眼底、顎骨、下巴或鼻部周圍作「烘培」（baking)
唔少人對使用蜜粉最大嘅顧慮就係佢會令面部細紋更明顯，甚至出現「龜裂」。無可否認，油性肌寶寶的確最適合使用蜜粉，但只要揀啱蜜粉、識用蜜粉，無論咩膚質嘅人都可以carry到呢種妝感。秘訣就係要揀一種成分純淨、不含毒素又啱自己皮膚嘅蜜粉！
如何利用蜜粉打造不同妝感
蜜粉係美妝界嘅百變小櫻！正確使用蜜粉，無論係咩場合、遇上咩天氣都好，妝容都可以維持完美無暇。以下落黎隆重為大家介紹蜜粉一系列使用法，想霧面又得、水潤又得，得左！
- 全霧面妝
1. 先搽上補濕產品及妝前底霜
2. 然後搽粉底，無論液體、霜狀或粉狀粉底都無所謂
3. 用美妝蛋輕輕印一印塊面，吸收多餘水分
4. 趁粉底未完全乾透，在全臉敷上有色或無色蜜粉
- 半霧面妝
1. 先搽上補濕產品及妝前底霜
2. 然後搽粉底，無論液體、霜狀或粉狀粉底都無所謂
3. 用美妝蛋輕輕印一印塊面，吸收多餘水分
4. 係面部容易出油位（例如T字骨位）上蜜粉
- 柔和光澤妝
1. 先搽上補濕產品及妝前底霜
2. 然後搽粉底，無論液體、霜狀或粉狀粉底都無所謂
3. 用美妝蛋輕輕印一印塊面，吸收多餘水分
4. 趁粉底未完全乾透，用有色蜜粉打造半霧面感
5. 上高光粉
6. 如果你使用液體或霜狀高光，記得用無色蜜粉柔化妝感
- 水潤妝
1. 先搽上補濕產品及妝前底霜
2. 搽上液體或霜狀粉底
3. 用美妝蛋推開粉底，再輕輕印一印塊面，吸收多餘水分
4. 趁粉底未完全乾透，輕輕敷一層有色或無色蜜粉（記住輕手！）
5. 噴上定裝噴霧，令妝容睇落充滿水光感
小編貼士：唔想搽完蜜粉之後變皺皮怪？秘訣係先使用霜狀或液體產品，之後先上蜜粉。上完蜜粉後，定裝噴霧應該係你成個化妝步驟中最後一環。
如何使用蜜粉烘培（baking)
烘培係一個大約5-10分鐘嘅過程，形容係遮瑕膏上一層厚粉，「烘」麵包咁樣焗下5-10分鐘，然後用刷掃走剩餘蜜粉。烘培主要為預防溶妝情況出現，因為我地皮膚係自然而然會出汗及分泌油脂，如果你使用液體化妝產品，咁大熱天時就會出現浮粉徵狀，慘不忍睹！烘培就正正給予充分時間，讓粉底及遮瑕內嘅水分完全蒸發，等佢哋唔會妨礙皮膚本身天然生產嘅油脂。烘培過後即使再出汗，都唔會溶妝。
蜜粉烘培七部曲
1. 先搽上補濕產品及妝前底霜
2. 均衡塗上粉底
3. 係眼下周圍上一層厚嘅遮瑕或高光
4. 遮瑕上一層薄嘅無色蜜粉，亦可以係鼻梁、顎骨線及下巴位置上粉
5. 烘培時間到！用濕過水嘅美妝蛋沾一層厚嘅無色蜜粉，均衡敷上 4. 嘅位置。
6. 等候5-10分鐘
7. 用刷具輕輕掃走多餘粉末，然後上胭脂，完成！
小編小貼士
唔想蜜粉一撻撻、或者皺曬皮？即刻mark低以下幾個小貼士，包你全日維持完美無瑕肌：
- 千祈唔好係蜜粉上再用液體或霜狀產品！呢啲產品會改變蜜粉質地，令成塊面變得癡lup lup。最盡都只可以使用少量液體遮瑕膏，其他產品例如高光或胭脂都最好用返粉狀。
- 化妝前做好護膚！記得搽補濕液及妝前底霜，佢可以幫助填滿臉上一啲細紋，令蜜粉無咁易卡住係呢啲細坑紋入面。
- 蜜粉唔單止可以係粉底上使用，其實素顏一樣用得！佢可以發揮控油作用，令塊面全日保持乾爽。
- 記住：少數斷長計！如果你本身鐘意用粉狀粉底或者屬於乾性肌，咁就唔需要搽大量蜜粉。
總結就係一定要因應自己肌膚狀況決定如何使用蜜粉；只要肌膚行先，完美妝感自然話都無咁易啦！